މި ހިނގާ އޮކްޓޯބަރު މަހުގެ 24 އިން 27 އަށް އައްޑޫސިޓީގައި ބާއްވާ “ހަބްރޫޓު އަންޑަރ 25 ޗެމްޕިއަންޝިޕް” ފުޓުސަލް މުބާރާތުގެ ސްޕޮންސަރުންނާއެކު ސޮއިކޮށްފިއެވެ.
ސްޕޮންސަރުންނާއެކު ސޮއިކުރުމުގެ ހަފްލާ ބޭއްވީ ހިތަދޫ ޔޫތުސެންޓަރުގައެވެ. މުބާރާތުގެ މައި ސްޕޮންސަރަކީ މަރަދޫ ހަބްރޫޓެވެ. ކޯސްޕޮންސަރަކީ ދިރާގެވެ. މީޑީއާޕާޓްނަރަކީ އޭއޯނިއުސްއެވެ.
ސްޕޮންސަރުން ސޮއިކުރުމުގެ އިތުރަށް ބައިވެރިވާ ޓީމްތަކަށް ބައިވެރިވުމުގެ ފޯމް ހަވާލުކުރުންވެސް އޮތެވެ. މިހާތަނަށް 4 ޓީމަކުންވަނީ މުބާރާތުގައި ބައިވެރިވެފައެވެ. މުބާރާތުގެ ގުރުއަތުލުމުގެ ކުރިން ބައިވެރިވާން އެދޭ ޓީމްތަކަށް އަދިވެސް ފުރުސަތު އޮންނާނެ ކަމަށް މުބާރާތް އިންތިޒާމްކުރާ ޒުވާނުންގެ ގުރޫޕޫން މައުލޫމާތު ދިނެވެ. މުބާރާތުގެ ބައިވެރިވުމުގެ މުއްދަތު ހަމަވާނީ މިމަހު 23 ގައެވެ.
“މިއީ އައްޑޫ ސިޓީ ހިތަދޫ ޔޫތު ސެންޓަރާއި އައްޑޫ ވިމެންސް ފުޓުސަލް ގުރޫޕް ގުޅިގެން ބާއްވާ މުބާރާތެއް. މުބާރާތް އޮންނާނީ ހިތަދޫ ޒުވާނުންގެ މަރުކަޒުގެ ފުޓުސަލް ދަނޑުގައި،” މުބާރާތް އިންތިޒާމްކުރާ ފަރާތުން ބުންޏެވެ.
މި މި މުބާރާތް ހުޅުވުމުގެ ރަސްމިއްޔާތު އޮންނާނީ މިމަހު 24 ވަނަ ދުވަހު ހަވީރު 4:00 ގައެވެ. ފުރަތަމަ މެޗު އޮންނާނީ ހަވީރު 5:00 ގައެވެ.
