މާލޭ ޓެނަންޓްސް ޔޫނިއަން (އެމްޓީޔޫ) ގެ ނަމުގައި މާލޭގައި ކުއްޔަށް ދިރިއުޅޭ މީހުންގެ ޖަމިއްޔާއެއް އުފައްދައި މިއަދު ރަޖިސްޓަރީ ކޮށްފި އެވެ. މިއަދު އެ ޖަމިއްޔާ އިން ނެރުނު ނޫސްބަޔާނެއްގައި ބުނީ އެ ޖަމިއްޔާގެ މަގްސަދަކީ މާލޭގައި ކުއްޔަށް ދިރިއުޅޭ މީހުންގެ ހައްގުތައް ހިމާޔަތްކޮށް، ދިފާއުކުރުމާއި ކުއްޔަށް އުޅޭ މީހުންނަށް އެހީތެރިކަން ފޯރުކޮށްދިނުން ކަމަށެވެ.
އަލަށް އުފެއްދި މި ޖަމިއްޔާގެ މަގްސަދު ތަކުގެ ތެރޭގައި ކުލީ ދިރިއުޅުމާއި ބޯހިޔާވަހިކަމާ ގުޅުވައިގެން ރާވައިގެން ހިންގާ ކެމްޕޭނެއް ހިންގުންވެސް ހިމެނެއެވެ.
މާލޭގައި ކުއްޔަށް ދިރިއުޅޭ ކޮންމެ މީހަކަށްވެސް އެ ޖަމިއްޔާގައި ބައިވެރިވުމުގެ ފުރުސަތު ހުޅުވާލާފައިވާއިރު އެ ފަރާތްތަކުގެ ތަކުލީފުތަށް ހިއްސާ ކުރުމުގެ ފުރުސަތު ވެސް ވަނީ ހުޅުވާލައިފަ އެވެ. އެ ޖަމިއްޔާ އިން އިތުރަށް ބުނީ އެ ޖަމިއްޔާ އިން ކުރިއަށް އޮތް ތާނގައި ދޭނެ ހިދުމަތްތަކުގެ ތެރޭގައި އެއް ގެއިން އަނެއް ގެ އަށް ބަދަލުވާއިރު ދިމާވާ މައްސަލަތަކުގައި އެހީތެރިކަމާއި، ކޮންޓްރެކްޓް ހެދުމާއި އަދި އެހެނިހެން މައްސަލަތަކުގައި ވަކީލުންގެ އެހީތެރިކަމާއި އަދި ހޯމް އިންޝޫރަންސް ފަދަ ޚިދުމަތްތަށް ލިބޭނޭ ގޮތް ކުރިޔަށް އޮތްތާނގައި ހޯދައިދިނުމަށް އެހީތެރި ވެދޭނެ ކަމަށެވެ.
