ރާއްޖޭގެ ބާޒާރުގައި މިހާރު ވިއްކަމުންދާ ޖަރުމަންވިލާތުގެ ގާސްޓަލް – ނޮން އަލްކަހޯލިކް ބިއަރު ދަޅުތަކުގައި ބަނގު އާވި ކޮންމެވެސް ވަރަަކަށް ހިމެނޭކަމަށް ތަހުލީލުތަކުން ދައްކާތީ ކަސްޓަމްސް އިން އެތަކެތި ނެގުމަށް ނިންމާފައިވާ ކަމަށް އެ އިދާރާއިން ބުނެފިއެވެ.
މި މައްސަލަ ފުރަތަަމަ އާންމުންގެ ސަމާލުކަމަށް ގެނައީ ކުރީގެ ހޯމް މިނިސްޓަރ ޢުމަރު ނަސީރެވެ. އެގޮތުން ޢުމަރު މިދިޔަ ހަފްތާގައި ކުރި ޕޯސްޓެއްގައި ވިދާޅުވީ ގާސްޓަލް ބުއިމުގައި ބަނގުރާ ނުހިމެނޭ ކަމަށް ޖަހާފައި ވީނަމަވެސް އޭގައި ބަނގު އާވި ހިމެނޭ ކަމަށެވެ.
ކަސްޓަމްސް އިން ވަނީ އެ ބުއިން ތަހުލީލު ކޮށްފައެވެ. އަދި އެ ބުއުމުގައި 0.3 އިންސައްތަ ބަނގު އާވި ހިމެނޭ ކަމަށް ތަހުލީލުތަކުން ދައްކާ ކަމަށް ކަސްޓަމްސް އިން ނެރުނު ބަޔާނުގައި ބުނެފައިވެއެވެ.
މި ބުއިންތަކުގައި 0.3 އިންސައްތަ އަށްވުރެ ގިނަ ނޫން މިންވަަރަކަށް ބަނގު އާވި އެކުލެވޭކަން ލެބޯޓަރީ ތަހުލީލްތަކުން ކަސްޓަމްސްއަށް ސާބިތު ކުރެވިފައި ވަނީ 21 ޖުލައި 2019 ގައިކަމަށްވެސް މޯލްޑިވްސް ކަސްޓަމްސް ސާވިސްގެ ބަޔާނުގައި ބުނެފައިވެއެވެ.
