ކުރިޔަށް އޮތް ދުވަސްތައްވާނީ ޠާލިބާންނަށް ވަރަށް ހިތާމަވެރި ދުވަސްތަކަކަށެވެ. ސަބަބަކީ ޠާލިބާނުންގެ އިސްވެރިޔާ އަދި އެމީހުންގެ ބައްޕަގެ ޝަރަފު ދީފައިވާ މައުލާނާ ސާމީ އަލް ހައްގު ވަނީ ވަރަށް ފަހުން މަރާލާފައިކަމަށް ވުމެވެ. ޠާލިބާނުންނަކީ ޕާކިސްތާނުގައި ޙަރަކާތްތެރިވާ ހަތިޔާރު އެޅި ހަނގުރާމަވެރި ޖަމާއަތެކެވެ.
ޠާލިބާނުންގެ ބައްޕަ އަލް ހައްގު މަރާލާފައިވަނީ ޕާކިސްތާނުގެ އުތުރުގެ ސިޓީއެއް ކަމަށްވާ ރާވަލްޕިންޑީގައެވެ. ބައެއް މީޑިއާ ރިޕޯޓްތައް ބުނާ ގޮތުގައި އަލް ހައްގު މަރާލާފައި ވަނީ ހަންޖަރެއް ބޭނުންކޮށްގެންނެވެ. އޭނާގެ ގައިގެ 14 ތަނަކަށް ވަނީ ހަންޖަރު ހަރާލާފައެވެ. މިހާރު އަލް ހައްގު ވަޅުލާފައިވާއިރު އޭނާގެ ޕޯސްޓްމޯޓަމް ހެދުމާ އަލް ހައްގުގެ ދަރިފުޅުވަނީ ދެކޮޅުހަދާފައެވެ. އަލް ހައްގުގެ ޖަނާޒާއަށް އެތައް ހާސް ބަޔަކު ވަނީ ގޮސްފައެވެ.
ހައްގު މަރާލާފައިވަނީ އޭނާގެ އުމުރުން 82 އަހަރުގައިއެވެ.ހައްގަކީ ޕާކިސްތާނުގެ ސެނެޓުގައި1985 އިން 1991 އަދި 1991 އިން 1997 އަށް ހުންނެވި ބޭފުޅެކެވެ.އަދި މިހާރުގެ ޕާކިސްތާނުގެ ޕްރައިމް މިނިސްޓަރު އިމްރާމް ޙާންއާއެކުވެސް ގިނަ މަސައްކަތްތަށް ހައްގު ވަނީ ކޮށްފައެވެ.
ހައްގަކީ ޕާކިސްތާނުގެ އުތުރުގައި ހިންގަމުން އަންނަ ހައްގާނީ މަދަރުސާގެ އިސްވެރިޔާއެވެ. މި މަދަރުސާއަކީ ޠާލިބާނުންގެ ގިނަ ހަނގުރާމަވެރިން ތައުލީމު ހާސިލުކުރަމުންދާ މަދަރުސާއެވެ. ޠާލިބާނުންގެ ބާނީ މުއްލާ އުމަރު ވެސް ކިޔެވީ މިމަދަރުސާއިން ކަމަށް ބުނެވެއެވެ.
އަލް ހައްގަކީ ޠާލިބާނު ހަނގުރާމަވެރިންގެ ގިނަ ބަޔަކު އިހުތިރާމް ކުރާ މީހަކަށްވީއިރު، އޭނާގެ މަރާއި ގުޅިގެން އަފްޣާނިސްތާނާއި ޕާކިސްތާނުގައި ހަމަނުޖެހުންތައް އިތުރުވެދާނެ ކަމަށް މުރާސިލުން ދަނީ ބުނަމުންނެވެ.
