މި އަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި އިލެކްޝަންސް ކޮމިޝަން (އީސީ) އާ އެކު މަސައްކަތް ކުރާނެ މަންދޫބުން ހޯދަން އެ ކޮމިޝަނުން އިއުލާން ކޮށްފިއެވެ.
ރިޔާސީ އިންތިހާބަށް 179 ރަށު ފޯކަލް ޕޮއިންޓުންނާއި 18 އަތޮޅު ފޯކަލް ޕޮއިންޓުން އަދި ސިޓީތަކުން ވެސް ފޯކަލް ޕޮއިންޓުން ހޯދަން ބޭނުންވާ ކަމަށް އިލެކްޝަންސްގެ އިޢުލާނުގައި ބުނެފައިވެއެވެ.
އެހެން ރިޔާސީ އިންތިޚާބު ތަކެކޭ އޮއްގޮތަށް އެ ކޮމިޝަނުން ބުނިގޮތުގައި، އެ މަންދޫބުން ކުރަން ޖެހޭނެ މަސައްކަތަކީ އިންތިޚާބުގައި އިލެކްޝަންސް ކޮމިޝަނާއި ސިޓީ، އަތޮޅު އަދި ރަށު ކައުންސިލްގެ އިދާރާއާ ދެމެދު ހިންގާ ހުރިހާ މުޢާމަލާތްތަކުގައި މެދުވެރިއެއްގެ ރޯލް އަދާކުރުމެވެ
އެ މަސައްކަތަށް ކުރިމަތިލާ ފަރާތެއްގެ ހުންނަންޖެހޭ 5 ޝަރުތެއް އިޢުލާނުގައިވެއެވެ. އޭގެ ތެރޭގައި
ކައުންސިލް އިދާރާއެއްގައި މަސައްކަތް ކުރާ މީހަކަށް ވުން
އެއްވެސް ސިޔާސީ ޕާޓީއެއްގެ އިންތިހާބީ މަގާމެއް ނުވަތަ ޕާޓީގެ ފަރާތުން އައްޔަންކޮށްފައިވާ މަގާމެއް ފުރާ މީހަކަށް ނުވުން
އެއްވެސް ކެނޑިޑޭޓެއްގެ ކެމްޕެއިން ހަރަކާއްގައި އަމަލީ ގޮތުން ބައިވެރިވާ މީހަކަށް ނުވުން
އިންތިހާބަކަށް ކުރިމަތިލާ ކެންޑިޑޭޓެއްގެ އާއިލާ މެންބަރަކަށް ނުވުން
ސިޔާސީ އިސް ރޯލެއް އަދާ ކުރާ މީހެއް ކަމުގައި ނުވުން ހިމެނެއެވެ.
މަންދޫބުންނަށް އުޖޫރައެއްގެ ގޮތުގައި ކޮންމެ ދުވަހަކު ވެސް 200 ރުފިޔާ ދޭނެ ކަމަށާއި އަދި ކޮންމެ މަހަކު ފޯން އެލަވަންސްގެ ގޮތުގައި 150 ރުފިޔާ ދެވޭނެ ކަމަށްވެއެވެ.
އިލެކްޝަންސް ކޮމިޝަނުން ވަނީ ފޯކަލް ޕޮއިންޓުންގެ ގޮތުގައި ކުރިމަތިލުމުގެ ފުރުސަތު އަންނަ އާދިއްތަ ދުވަހުގެ ނިޔަލަށްހުޅުވާލައިފަ އެވެ.
