ސްޕޯޓްސް ކޮމިޝަނަރުގެ މަގާމަށް އެފްއޭއެމްގެ އެގްޒެކެޓިވް ކޮމިޓީގެ މެމްބަރު އަދި ގައުމީ ޓީމުގެ ކުރީގެ އެންމެ މޮޅު އެއް ފޯވާޑް އަލީ އުމަރު ހަމަޖައްސައިފި އެވެ
އަލީ އުމަރު މި މަގާމަށް އައްޔަން ކޮށްފައި މިވަނީ ކުރިން މިމަގާމު ފުރަމުން ގެންދިޔަ އަހްމަދު ނަޝީދު (ޑޭވް) މިދިޔަ އަހަރު ޑިސެމްބަރު މަހު އިސްތިއުފާ ދެއްވުމުންނެވެ
1998 އިން ފެށިގެން 2013 ވަނަ އަހަރާ ހަމައަށް ގައުމީ ޓީމަށް ކުޅެފައިވާ އަލީ އުމަރު ވަނީ 2008 ވަނަ އަހަރު އިންޑިޔާ ބަލިކޮށް ރާއްޖެ ސަރަހައްދީ އެންމެ ބޮޑު ފުޓްބޯޅަ މުބާރާތް ކަމުގައިވާ ޝާފް ޗެމްޕިއަން ޝިޕް ރާއްޖެ ކާމިޔާބު ކުރި އިރު ވެސް ޓީމުގައި މުހިންމު ދައުރެއް އަދާކޮށްފައެވެ
ރާއްޖޭގައި އުފެދުނު އެންމެ މޮޅު ފޯވާޑުންގެ ތެރޭގައި އަލީ އުމަރު ހިމެނޭއިރު އޭނާގެ ފުޓްބޯޅަ ކެރިއަރުގައި ކްލަބު ވެލެންސިޔާ، ވީބީ އައްޑޫ އެފްސީ އަދި ނިއު ރޭޑިއަންޓަށް ވެސް ކުޅެފައެވެ
ސްޕޯޓްސް ކޮމިޝަނަކީ ރާއްޖޭގެ ކުޅިވަރުގެ ހުރިހާ ކަމެއް ބެލުމަށާއި ކުޅިވަރު އިދާރާތައް ބެލެހެއްޓުމަށް ސަރުކާރުން އެކުލަވާލާފައިވާ އިދާރާއެކެވެ
އެފްއޭއެމްގެ އެސްކޯގެ އިތުރުން އަލީ އުމަރަކީ ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ އެގްޒެކެޓިވް ކޮމިޓީގެ ވެސް މެމްބަރެކެވެ
