ފީފާއިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފޮނުވި ފައިސާ ލޯންޑާކުރުމުގައި އެހީތެރިވިކަމުގެ ތުހުމަތު އޮތް މުހައްމަދު އަގީލް، ފިލައިގެން ރާއްޖޭން ބޭރުގައި އުޅެނިކޮށް، އިންޓަޕޯލް ރެޑް ނޯޓިސް ނެރެގެން ތައިލެންޑުގެ ބެންކޮކުން ހައްޔަރުކޮށްފިއެވެ.
އަގީލް ހައްޔަރުކޮށްފައި މިވަނީ، އެފްއޭއެމްގެ ފައިސާއަށް ހިޔާނަތްތެރިވި މައްސަލައިގައި އެތަނުގެ ކުރީގެ ރައީސް ބައްސާމް އަދީލް ޖަލީލުގެ ޝަރީއަތަށް، އަގީލް ހައްޔަރުކޮށްގެން ހާޒިރުކުރުމަށް ކޯޓުން ކުރިން އަމުރުކޮށްފައި ވަނިކޮށެވެ. ނަމަވެސް އޭރު އޭނާ ވަނީ ފިލައިގެން ރާއްޖޭން ބޭރަށް ގޮސްފައެވެ.
ދައުލަތުން އަގީލްގެ މައްޗަށް އުފުލާފައިވަނީ މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން، މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާއެވެ.
އެފްއޭއެމްގެ ހިޔާނާތުގެ މައްސަލައިގައި ބައްސާމްގެ މައްޗަށް ކުށް ސާބިތުވެ، 32 އަހަރަށް ޖަލަށްލުމަށް ކޯޓުން މިހާރު ވަނީ ހުކުމްކޮށްފައެވެ.
ފާހަގަކޮށްލެވޭ ގޮތުގައި، މީގެ ކުރިން ބައްސާމްގެ މައްސަލައިގައި އަގީލް ވަނީ ކޯޓަށް ހާޒިރުވެ ހެކިބަސް ވެސް ދީފައެވެ. އެފަހަރު ޝަރީއަތުގައި ހެކިބަސް ދެމުން އޭނާ ވަނީ، ބައްސާމް މަހަކު 5،000 ޑޮލަރުގެ އެލަވަންސެއް ނެންގެވި ކަމަށް ބުނެފައެވެ.
