ސްޕެޝަލް އިކޮނޮމިކް ޒޯން (އެސްއީޒެޑް) ގެ ދަށުން ރާއްޖޭގައި ތެލާއި މައުދަން ހޯދުމުގެ މަސައްކަތް ކުރުމަށް އިންވެސްޓްކުރުމުގެ ފުރުސަތު ރައީސް ޑރ. މުހައްމަދު މުއިއްޒު މިއަދު ހުޅުވާލައްވައިފިއެވެ. މި ފުރުސަތު ހުޅުވާލެއްވީ އެސްއީޒެޑްގައި ހިންގޭނެ އިގުތިސޯދީ މަސައްކަތްތައް ކަނޑައަޅައި ނެރުއްވި ރިޔާސީ ގަރާރުގައެވެ.
ރައީސް މިއަދު ނެރުއްވި ގަރާރުގައި، އެސްއީޒެޑްގައި އިންވެސްޓްކުރެވޭނެ ދާއިރާތަކުގެ ލިސްޓަށް ވަނީ ބަދަލުތަކެއް ގެނެސްފައެވެ. އެގޮތުން އެންމެ ބޮޑު ބަދަލަކަށް ފާހަގަކުރެވެނީ، މީގެ ކުރިން އެ ލިސްޓުގައި އޮތް ގޭސް ހޯދުމުގެ މަސައްކަތުގެ ބަދަލުގައި، އެ ދާއިރާ ފުޅާކޮށް ތެލާއި ގޭހުގެ އިތުރުން މައުދަން ނުވަތަ މިނެރަލްސް ހޯދުމުގެ މަސައްކަތް ވެސް ހިމަނާފައިވުމެވެ.
މި ގަރާރުގައިވާ ގޮތުން، އެސްއީޒެޑްގައި ހިންގާ އިގުތިސޯދީ މަސައްކަތްތަކަށް އިންވެސްޓްކުރެވޭނެ އެންމެ ކުޑަ މިންވަރަކީ 100 މިލިއަން އެމެރިކާ ޑޮލަރެވެ. ނަމަވެސް، ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކަށް އިންވެސްޓްކުރާނަމަ، އިންވެސްޓްމަންޓުގެ އަގު 500 މިލިއަން ޑޮލަރަށްވުރެ ކުޑަވެގެން ނުވާނެ ކަމަށް ގަރާރުގައި ބަޔާންކޮށްފައިވެއެވެ.
ތެލާއި މިނެރަލްގެ އިތުރުން، އިންވެސްޓްކުރުމަށް ހުޅުވާލައިފައިވާ މައިގަނޑު ދާއިރާތަކުގެ ތެރޭގައި އެކްސްޕޯޓަށް އަމާޒުކޮށްގެން ހިންގާ މެނުފެކްޗަރިންގެ މަސައްކަތްތަކާއި، ޓްރާންސްޝިޕްމަންޓް ޕޯޓާއި، އިންޓަނޭޝަނަލް ލޮޖިސްޓިކްސް އަދި ބަންކަރިން ފަދަ ޕޯޓާ ގުޅުންހުރި ހިދުމަތްތައް ހިމެނެއެވެ. އަދި އިއާދަކުރަނިވި ހަކަތައާއި ފުޑް ސެކިއުރިޓީގެ ދާއިރާއަކީ ވެސް އިންވެސްޓްކުރެވޭނެ ދާއިރާތަކެވެ.
މީގެ އިތުރުން ތައުލީމީ އަދި ސިއްހީ ދާއިރާ ތަރައްގީކުރުމަށް ވެސް ހާއްސަ އިސްކަމެއް ދީފައިވެއެވެ. އޭގެ ތެރޭގައި ޔުނިވާސިޓީތަކާއި، ޓާޝަރީ ހޮސްޕިޓަލްތައް އަދި ސްޕެޝަލިޓީ ހޮސްޕިޓަލްތައް ގާއިމުކުރުން ހިމެނެއެވެ. ހަމައެއާއެކު، ދުނިޔޭގެ ފެންވަރުގެ އައިސީޓީ ޕާކުތައް ހެދުމާއި، ރާއްޖޭގައި ނެތް އާ ޓެކްނޮލޮޖީތައް ތައާރަފުކުރުމަށް ހިންގާ މަޝްރޫއުތަކަށް ވެސް ވަނީ ފުރުސަތު ހުޅުވާލައިފައެވެ.
އެސްއީޒެޑް ގާނޫނުގައި ބަޔާންކޮށްފައިވާ ގޮތުން، އެ ޒޯންތަކުގައި ހިންގިދާނެ އިގުތިސޯދީ މަސައްކަތްތަކާއި އިންވެސްޓްމަންޓުގެ އެންމެ ކުޑަ މިންގަނޑު ކޮންމެ އަހަރަކު ވެސް ކަނޑައަޅަން ޖެހެއެވެ. ރައީސް މިކަން ކަނޑައަޅުއްވަނީ ބޯޑް އޮފް އިންވެސްޓްމަންޓްސްގެ ލަފާގެ މަތިންނެވެ.
