ޢީދު ދުވަހު އުޅަނދު ދުއްވުން މަނާ ގަޑިތައް ކަނޑައަޅައި ނެރުނު އިޢުލާން ބާޠިލުކޮށްފިއެވެ.
ޓްރާންސްޕޯޓުން މިނިސްޓްރީން އެކްސްގައި ކުރެއްވި ޕޯސްޓެއްގައި ވިދާޅުވީ އިންޖީނުލީ އެއްގަމު އުޅަނދު ފިތުރު އީދު ދުވަހު ގްރޭޓާ މާލޭ ސަރަހައްދުގައި ދުއްވުން މަނާ ވަގުތު ކަނޑައެޅުމާ ގުޅޭ ގޮތުން އެ މިނިސްޓްރީން ކުރި އިއުލާނު ބާތިކޮށްފައިވާ ކަމަށެވެ. ނަމަވެސް، ބާތިލް ކުރަން ނިންމި ސަބަބެއް ނުބުނެ އެވެ.
ޢީދު ދުވަހު އުޅަނދު ދުއްވުން މަނާ ގަޑިތައް ކަނޑައަޅައި ދަތުރުފަތުރާ ބެހޭ ވުޒާރާއިން އިޢުލާނެއް ނެރުއްވީ މިދިޔަ ހުކުރު ދުވަހުއެވެ. އެ އިޢުލާނުގައިވާ ގޮތުން މިއަދު 16:00އިން 18:00އާ ހަމައަށް އެއްވެސް އުޅަނދެއް މާލެ ސަރަހައްދުގައި ދުއްވުން މަނާވާނެކަމަށް ބަޔާންކުރައްވާފައިވެއެވެ. އަދި ބަރު އުޅަނދު ދުއްވުން 23:30 އާ ހަމައަށްވެސް ވަނީ މަނާކޮށްފައެވެ.
މި އެންގުން ބާތިލްކުރީ، އެއަށް އަމަލުކުރަން ފެށިތާ ގަޑިއެއްހާ އިރުވީ ފަހުންނެވެ.
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވީ މި އަހަރުގެ ފިޠުރު ޢީދު ދުވަހާ ގުޅިގެން މާލެ ސަރަހައްދުގައި އުޅަނދު ދުއްވުން މަނާ ގަޑިތައް ކަނޑައަޅައި، ނެރުނު އިޢުލާން މިހާރު ބާޠިލުކޮށްފައިވާ ކަމަށެވެ. އެހެންކަމުން ހުރިހާ އުޅަނދެއްވެސް މިހާރު ދުއްވޭނެކަމަށް އެ ވުޒާރާއިން ވިދާޅުވިއެވެ.
އިޢުލާން ބާޠިލުކުރި ވަކި ސަބަބެއް ދަތުރުފަތުރާ ބެހޭ ވުޒާރާއިން ހާމަކުރައްވާފައެއް ނުވެއެވެ.
