މުޅި ރާއްޖެއަށް ހުޅުވާލައިގެން ބޭއްވި ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ރާއްޖޭގެ އެކި ކަންކޮޅުތަކުން ބައިވެރިވި ޓީމުތަކާއި، އެ ޓީމުތަކުގެ ސަޕޯޓަރުން ދިވެހި ފުޓުބޯޅައިގެ ރޫޙު އަލުން ދިރުވައިދީފި ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެ އެވެ.
ނައިބު ރައީސް މިހެން ވިދާޅުވީ ނައިންޓީ ޕްލަސް ގޯލްޑް ކަޕް 2024 ކާމިޔާބުކުރި ބ.އޭދަފުށީގެ ޓީމަށް ތަހުނިޔާއާއި މުބާރިކުބާދީ އަރިސްކޮށް ސޯޝަލް މީޑިއާގައި ކުރެއްވި ޕޯސްޓެއްގައެވެ.
” “90 ޕްލަސް ގޯލްޑް ކަޕް 2024″ ކާމިޔާބު ކުރި ބ.އޭދަފުށީގެ ޓީމަށް ތަހުނިޔާއާއި މުބާރިކުބާދީ އަރިސްކުރަން އަދި ޓީމުގެ ކުޅުންތެރިން ދެއްކި ހުނަރަށް ސާބަސް ދަންނަވަން. ހަމައެއާއެކު އައްޑޫ ސިޓީގެ ޓީމުން މުބާރާތުގައި ދެއްކި މޮޅު ކުޅުމާއި ކުރި ހިތްވަރުވެސް ފާހަގަކުރަން. ދެ ޓީމުގެ ސަޕޯޓަރުންވެސް މިރޭ ގަލޮޅު ދަނޑަށް އައު ދިރުމެއް ގެނުވައިފި. މި މުބާރާތުގައި ރާއްޖޭގެ އެކި ކަންކޮޅުތަކުން ބައިވެރިވި ޓީމުތަކާއި އެ ޓީމުތަކުގެ ސަޕޯޓަރުން ދިވެހި ފުޓުބޯޅައިގެ ރޫޙު އަލުން ދިރުވައިދީފި. މި ފުރުޞަތުގައި ގޯލްޑް ކަޕް 2024 އިންތިޒާމު ކުރުމުގައި ޙަރަކާތްތެރިވި ފަރާތްތަކުން ކުރި މަސައްކަތް ފާހަގަކޮށް ޚާއްޞަ ޝުކުރެއް ދަންނަވަން.”
އަންގާރަ ދުވަހުގެރޭ ގަލޮޅު ދަނޑުގައި ކުރިޔަށް ދިޔަ ފޯރިގަދަ ފައިނަލް މެޗު 2-0 ން އޭދަފުީ ޓީމް ކާމިޔާބުކުރި މެޗްގައި ރައީސުލްޖުމުހޫރިއްޔާ ވެސް ވަނީ ބައިވެރިވެ ވަޑައިގަންނަވާފައެވެ. އަދި މިއީ ފަހުގެ ތާރީހެއްގައި އެންމެ ގިނަ ސަޕޯޓަރުން ގަލޮޅު ދަނޑަށް ވަން މެޗްކަން ފާހަގަކޮށްލެވެއެވެ.
ނިމިގެން މިދިޔަ ފޯރި ގަދަ ފުޓްބޯޅަ މުބާރާތަކީ ރާއްޖޭގައި ފުޓްބޯޅައިގެ ރޫޙު ވަޅުޖަހާފައި އޮންނަތާ އަހަރުތަކެއް ފަހުން އަލުން ފުޓްބޯޅަ ދިރުވައި އާލާކޮށްދިން މުބާރާތެކެވެ.
