މޯލްޑިވްސް ބޮޑީ ބޯޑިންގ އެސޯސިއޭޝަނުން އިންތިޒާމްކޮށްގެން ބާއްވަމުން އަންނަ ގައުމީ ބޮޑީބޯޑިންގ ލީގުގެ މި އަހަރުގެ ދެވަނަ އިވެންޓް އޮންނާނީ ފުވައްމުލަކުގައި ކަމަށް އިއުލާންކޮށްފިއެވެ.
މިކަން އެ އެސޯސިއޭޝަނުން އިއުލާންކޮށްފައިވަނީ މިމަހުގެ 18އިން 20އަށް ލޮނުޒިޔާރަތްކޮޅު ވަރުނުލާ ރާޅުގަނޑު ސަރަހައްދުގައި ކުރިޔަށް ގެންދިޔަ “ބުރުނު ޝިކާރު ބޮޑީ ބޯޑިންގ ޗެލެންޖް 2023”ގެ ނިންމުމުގެ ރަސްމިއްޔާތުގައެވެ. އެގޮތުން އެ މުބާރާތުގެ މެންސް އޯޕަން އިން ޗެމްޕިއަންކަން ހޯދި އަޝްރަފް ހަސަންގެ ނަން އިއުލާން ކުރަމުން ބޮޑީ ބޯޑިންގ އެސޯސިއޭޝަނުން އަޝްރަފް އަކީ ފުވައްމުލަކުގެ ޒުވާނެއްކަން އިއުލާންކުރަމުން ބުނެފައިވަނީ ދެން އަޝްރަފް އެތުލީޓުންނާއި ވާދަކުރާނީ އަޝްރަފްގެ އުފަން ރަށް ފުވައްމުލަކުން ކަމުގައެވެ. އަދި އެ މުބާރާތް އޮންނާނީ ސެޕްޓެމްބަރު މަހުގައި ކަމަށްވެސް އެފަރާތުންވަނީ އިއުލާންކޮށްފައެވެ.
މި ނިމުނު މުބާރާތުގައި މެންސް އޯޕަންގެ ފައިނަލުގައި ވާދަކޮށްފައިވަނީ އަޝްރަފް ހަސަން، އަލީ ޚުޝްރުވާން އަހުމަދު (ކުޑަ އައްޔަ)، އާމިން އަދި އަލީ ޝާމް ރާފިއުއެވެ. އަދި އަޝްރަފް އެ ކެޓެގަރީއިން އެއްވަނަ ހޯދައިފައިވަނީ 14.16 ޕޮއިންޓު ހޯދައިގެންނެވެ. 2 ވަނަ ހޯދި ކުޑަ އައްޔަށް 13.50 ޕޮއިންޓު ލިބުނު އިރު އާމިން އަށް ތިން ވަނަ ލިބފައިވަނީ 13.20 ހޯދައިގެންނެވެ. އަދި ހަތަރު ވަނަ ލިބުނު ޝާމްއަށް ލިބުނީ 12.60 ޕޮއިންޓެވެ.
ޖޫނިއަރ ބައިގެ ޗެމްޕިއަންކަން އާމިން 10.40 ޕޮއިންޓުން ހޯދައިފައިވާއިރު ދެވަނަ ލިބިފައިވަނީ މިދިޔަ އަހަރުގެވެސް ޖޫނިއަރ ބައިގެ ދެވަނަ ހޯދައިފައިވާ އިޔާން އަހުމަދަށެވެ. އޭނާއަށް ދެވަނަ ލިބުނީ 9.26 ޕޮއިންޓުންނެވެ. ތިންވަނާގައި ނިމުނު ކައިފްއަށް ލިބިފައިވަނީ 8.90 ޕޮއިންޓެވެ.
ޑްރޮޕް ނީގެ ބައިން ކުޑަ އައްޔަ 7.40 ޕޮއިންޓު ހޯދައި ޗެމްޕިއަންކަން ހޯދައިފައިވާއިރު އޭނާ ވަނީ ތަށި ދިފާއުކޮށްފައެވެ.
