English Edition
Dhivehi Edition

ބިރެއްނެތި މީހުންނަށް މިފަދަ އަނިޔާތައް ކުރަން ކެރެނީ ޖޫރިމަނާ ކުރުމަށް ފަހު ދޫކޮށްލާތީ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ފާޑުވިދާޅުވެއްޖެ އެވެ.

އޭނާ މިހެން ވިދާޅުވީ ގދ. މަޑަވެލީގައި ފިރިހަނަކު، އަންހެނަކަށް އަނިޔާކޮށް މަގުމައްޗަށް ނެރެ ދަމާ ކޫއްތައިގެން މަގުމަތީގައި ގެންދާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވަމުންދާ ވަގުތެއްގަ އެވެ.

ރޮޒައިނާ ވިދާޅުވީ ބިރެއްނެތި މީހުންނަށް މިފަދަ އަނިޔާތައް ކުރަން ކެރެނީ ޖޫރިމަނާ ކުރުމަށް ފަހު ދޫކޮށްލާތީ ކަމަށެވެ.

“ދެން 200 ރުފިޔާއިން ޖޫރިމަނާ ކޮށްފަ މި މީހާ ދޫކޮށްލާނީ އެއް ނޫން. މިހިރީ ވާ ވަރަށް ހެކި ފެންނަން” ރޮޒައިނާ ވިދާޅުވި އެވެ.

މީގެ އިތުރުން ރާއްޖޭގެ އަދުލު އިންސާފުގެ ނިޒާމުގައި ހުރި ‘ދޯދިޔާކަން’ ހާމަކުރައްވާ ރޮޒައިނާ ވިދާޅުވީ މިއީ މުޖްތަމައުއަށް ނުރައްކާތެރި މީހުން ކަމަށާއި މި މައްސަލައިގައި އިންސާފު ލިބެން ޖެހޭ ކަމަށެވެ.

މި ހާދިސާގައި އަނިޔާ ލިބުނު އަންހެން މީހާއަށް މަޑަވެލީ ސިއްހީ މަރުކަޒުން ފަރުވާ ދީފައި ވާއިރު، އެމީހާ މިހާރުވަނީ އެ ރަށުން ފުރުވާލާފައެވެ.

މި މައްސަލައާއި ގުޅިގެން 33 އަހަރުގެ މީހެއް ހައްޔަރުކޮށްފައިވާ ކަމަށް ވަނީ މައުލޫމާތު ލިބިފަ އެވެ.