ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރަންވާނީ އައު ދައުރަކަށް ކަމަށާއި، ކުއްލިއަކަށް މުސާރަ ކުޑަކޮށްފިނަމަ މަޖިލިސް އިންތިޚާބަށް ނެގި ދަރަނި އަދާކުރާނެ ގޮތެއް ނޯންނާނެ ކަމަށް ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު މިރޭ ވިދާޅުވެއްޖެއެވެ.
ރައްޔިތުންގެ މަޖިލިސް މެމްބަރުންގެ މުސާރަ ކުޑަކޮށް، ކުރީގެ މެމްބަރުންނަށް ދޭ އިނާޔަތް ކަނޑާލަން ގޮވާލާ ޕެޓިޝަނެއްގައި ސޮއިކުރަމުންދާ މި ދަނޑިވަޅުގައި އެކްސްގައި ކުރެއްވެވި ޕޯސްޓެއްްގައި ފަލާޙް ވިދާޅުވީ މިފަދަ ބަދަލެއް ގެންނަން ރަނގަޅީ މަޖިލީހުގެ ދައުރެއް ނިމި، އާ ދައުރެއްގެ އިންތިޚާބަށް ފަހުގައި ކަމަށާއި މުސާރަކުޑަކުރުން އެއީ ގޯސް ޚިޔާލެއް ނޫން ކަމަށެވެ.
އެމްޑީޕީގެ ސުޕަ މެޖޯރިޓީ އޮތް، މިދިޔަ 19 ވަނަ މަޖިލީހުގެ މެންބަރުން ދިޔައީ މެންބަރެއްގެ މުސާރަ 100،000އަށް ހަދަން ކަމާއި ގުޅުންހުރި ކޮމިޓީއިން ފާސްކޮށްފައިކަން ފަލާޙު ވިދާޅުވިއެވެ ފާހަގަކުރެއްވިއެވެ. ނަމަވެސް އެކަން އެގޮތަށް ނުކުރަން އިރުޝާދު ދެއްވީ މިހާރުގެ ރައީސް ޑރ. މުހައްމަދު މުއިއްޒު ކަމަށްވެސް ފަލާހު ވަނީ ވިދާޅުވެފައެވެ.
ފަލާޙު ވިދާޅުވީ މަޖިލިސް މެންބަރުންގެ މުސާރައަށް ބަދަލު ގެނައުން ރަނގަޅީ މަޖިލީހުގެ ދައުރެއް ނިމި އައު ދައުރެއްގެ އިންތިޚާބާ ޖެހުމުން ކަމަށެވެ. އެއީ، އެތައް މިލިއަން ރުފިޔާއެއް ޚަރަދުކުރުމަށް ފަހު މަޖިލީހަށް ވަންނަ ތަނުން މުސާރަ ކުޑަކޮށްފިނަމަ އިިންތިޚާބަށް ނެގި ދަރަނި އަދާކުރާނެ ގޮތެއް ނޯންނާނެތީ ކަމަށް ފަލާހު ވިދާޅުވިއެވެ.
“ވީމަ އަލަށް 21ވަނަ މަޖިލީހަށް، މެމްބަރަކަށް 5000 ރުފިޔާ ކަނޑައެޅީމަ އެ މުސާރަ އޯކޭވެގެން ކުރިމަތިލާ މެމްބަރުންނަކަށް ޝަކުވާކުރެވޭކަށް ނޯންނާނެ،” ފަލާހު ވިދާޅުވިއެވެ.
ރާއްޖޭގެ އިގްތިސާދީ ހާލަތު ރަނގަޅުކޮށް، ދައުލަތުގެ އާމްދަނީ އިތުރުކުރުމަށް ސަރުކާރުން އަޅަމުންދާ ފިޔަވަޅުތަކަށް އެއްބާރުލުން ދެއްވުމުގެ ގޮތުން ކުރިއަށް އޮތް އެއް އަހަރަށް މުސާރައިގެ 10 ޕަސެންޓް އުނިކުރުމަށް ފަހު، މުސާރަ ނަންގަވަން ފަލާޙު ވަނީ މިދިޔަ އަހަރުގެ އޮކްޓޯބަރު މަހުގައި ނިންމަވާފައެވެ.
މެމްބަރުންނަށް މިހާރު މުސާރައިގެ ގޮތުގައި މަހެއްގެ މައްޗަށް 62،000ރ. އަދި ކޮމިޓީ އެލަވަންސްގެ ގޮތުގައި 20،000ރ. އާ އެކު މަހެއްގެ މައްޗަށް 82،500ރ. ލިބެއެވެ.
މިހާރު މަޖިލީހުގައި ތިއްބެވި 93 މެމްބަރުންގެ ހަމައެކަނި މުސާރައަށް ދައުލަތުން މަހަކު 7.67 މިލިއަން ހަރަދުކުރެއެވެ.
ރާއްޖޭގެ އިގްތިސާދީ ހާލަތާ ގުޅިގެން މެމްބަރުންނާއި ދައުލަތުގެ އިސްވެރިންނާއި މިނިވަން މުއައްސަސާތަކުގެ އިސްވެރިންގެ މުސާރަތައް ކުޑަކުރަން މިދިޔަ އަހަރު ސަރުކާރުން މަޖިލީހަށް ވެސް ހުށަހެޅި އެވެ. ނަމަވެސް މަޖިލީހުން ނިންމާފައި އޮތީ މުސާރަތައް ކުޑަ ނުކުރުމަށެވެ.
