އިންޑިއާގެ ޓެލެވިޜަންގެ ސްކްރީންތަކުން އެންމެ މަތީ ރޭޓިން ލިބޭ ޝޯތަކުގެ ތެރޭގައި ރޫޕާލީ ގަންގުލީ ލީޑް ރޯލުން ފެނިގެންދާ އަނޫޕްމާ ހިމެނެއެވެ. ޖެނުއަރީ 3، 2024 ގައި އިންޓަނެޓްގައި ރިޕޯޓްތައް ބުނެފައި ވަނީ އަނޫމާމާގެ ލީޑް ރޯލް ކުޅޭ ރޫޕާލީ, ގަންގޫލީ ރާޖަން ޝާހީ ޕްރޮޑިއުސްކުރާ މި ޝޯއިން ވަކިވާން އުޅޭ ކަމަށެވެ.
އެހެންނަމަވެސް ރާޖަން ޝާހީގެ ޕްރޮޑަކްޝަން ހައުސް އިން ވަނީ، ރޫޕާލީ އަނޫޕަމާ ވަކިނުވާކަން ކަށަވަރުކޮށްދީފައެވެ. އެ ޕްރޮޑަކްޝަން ހައުސް އިން ބުނީ ބަތަލާ ޝޯއިން ވަކިވި ރިޕޯޓްތަކަކީ ‘ދޮގު އަދި އަސާސެއް ނެތް’ ރިޕޯޓްތަކެއް ކަމަށެވެ. ފަހަކަށް އައިސް ޝޯގެ މެދުތެރެއިން އެކްޓަރުން ޝޯ ދޫކޮށްލުމާއި ނުސީދާ ގޮތެއްގައި ރޫޕާލީ ގަންގޫލީ އާއި ގުޅުމެއް ވާކަމުގެ ތުހުމަތުތައް ގިނައެވެ. އަދި ބައެއް އެކްޓަރުން ވަނީ ސެޓްގައި ލީޑް ބަތަލާއާ އެކު ޒުވާބު ކުރި ކަމަށް އިއުތިރާފުވެސްވެފައެވެ.
ނަމަވެސް އޭބީޕީ ނިއުސްއަށް ދިން އިންޓަވިއުއެއްގައި ރުޕާލީ ވަނީ އޭނާގެ މައްޗަށް ކުރެވުނު ހުރިހާ ތުހުމަތުތައް ދޮގުކޮށްފައެވެ. އަނޫޕާމާގެ ޕްރޮޑިއުސަރު ރާޖާން ޝާހީ އާއި ޗެނަލްގެ ނިންމުންތަކަށް އޭނާގެ އެއްވެސް ނުފޫޒެއް ނެތްކަން ލީޑް ބަތަލާ ސާފުކޮށްދިނެވެ.
މީގެ ހަފްތާއެއްހާ ދުވަސް ކުރިން އަނުޕާމާ ސުރުޚީތަކުގައި އޮތީ ކުރިން އެއްވެސް އެންގުމަކާ ނުލައި އަލީޝާ ޕަރްވީން ޝޯއިން ވަކިކޮށް، ލީޑް ރޯލް ކުޅެން އަދްރިޖާ ރޯއީ ހަމަޖެއްސި ވާހަކައެވެ. ޓީއާރުޕީ ޗާޓުން ފުރަތަމަ ޖާގަ ގެއްލިފައިވާތީވެސް އެ ޝޯ ސުރުޚީތަކަށް އަރަމުން އަންނަތާ ދުވަސްކޮޅެއް ވެއްޖެއެވެ. ކުރިން އެންމެ މަތީ ރޭޓިން ޝޯއަކަށް ވެފައި އޮތް އަނޫޕާމާ މިހާރު ވަނީ ގަދަ 3 ޝޯއިން ބޭރުވެފައެވެ. ޓީއާރުޕީގެ އެންމެ ފަހުގެ ރިޕޯޓުގައި އެ ޝޯ ވަނީ 2.3 ރޭޓިން ހޯދައިގެން ހަތަރު ވަނަ ހޯދާފައެވެ.
