ފުވައްމުލައް ސިޓީގައި ރަޖިސްޓްރީކޮށްގެން ހިންގާ ކުދި އަދި މެދުފަންތީގެ ވިޔަފާރިތައް ފުޅާ ކުރުމަށާއި، ފުވައްމުލަކުގައި ކުދި ވިޔަފާރި ފަށަން ބޭނުންވެފައި ތިބި ފަރާތްތަކަށް ފުވައްމުލަކު ސިޓީ ކައުންސިލުން ދޫކުރުމަށް ނިންމައިފައިވާ މައިކްރޯފައިނޭންސް ސްކީމް މިއަދު އިފްތިތާޙްކޮށްފިއެވެ.
މިއަދު ފުވައްމުލަކު ސިޓީ ކައުންސިލުގެ ކުރުނދުމާ މާލަމުގައި މި ސްކީމް އިފްތިތާޙް ކުރުމަށް ބޭއްވުނު ރަސްމިއްޔާތެއްގައި މި ސްކީމް އިފްތިތާޙްކޮށް ދެއްވައިފައިވަނީ ފުވައްމުލައް ސިޓީގެ މޭޔަރ އިސްމާއީލް ރަފީޤެވެ. ފުވައްމުލަކު ސިޓީ ކައުންސިލުން މަޢުލޫމާތު ދެއްވި ގޮތުގައި މި ލޯން ސްކީމް ތަޢާރަފުކުރުމުގެ މައިގަނޑު މަޤުޞަދަކީ ފުވައްމުލައް ސިޓީގައި ރަޖިސްޓްރީކޮށްގެން ހިންގާ ކުދި އަދި މެދުފަންތީގެ ވިޔަފާރިތައް ފުޅާ ކުރުމަށާއި، ފުވައްމުލަކުގައި ކުދި ވިޔަފާރި ފަށަން ބޭނުންވެފައި ތިބި ފަރާތްތަކަށް އެފުރުޞަތު ފަހިކޮށް ދިނުމާއި މިސިޓީގެ ރައްޔިތުންގެ މާލިއްޔަތު އިތުރުކުރުމާއި ފަރުދުންގެ ދިރިއުޅުމުގެ ފެންވަރު މަތިކުރުމެވެ.
އެގޮތުން މިސްކީމްގެ ދަށުން ދޫކުރުމަށް ހަމަޖެހިފައިވަނީ އެންމެ ގިނަވެގެން މީހަކަށް ފަންސާސް ހާސް ރުފިޔާއެވެ. އަދި ލޯން ދައްކަން ފެއްޓުމުގެ ގްރޭސް ޕީރިއަޑެއްގެ ގޮތުގައި ގާތްގަނޑަކަށް 3 މަސް ދުވަސް ލޯނު ލިބޭ ފަރާތްތަކަށް ލިބިގެންދާއިރު ލޯން އެއްކޮށް ދައްކާ ޚަލާޞް ކުރުމަށް 5 އަހަރު ދެވިގެންދެއެވެ. އަދި ލޯނުގެ އިންޓަރެސްޓެއްގެ ގޮތުގައި ނެގުމަށް ކަނޑައަޅައިފައިވަނީ 5 އިންސައްތައެވެ. މި ލޯން ސްކީމަށް ކަނޑައަޅާފައިވާ ޖުމްލަ ރައުސުލްމާލުގެ މަދުވެގެން %40 އަންހެނުންނަށް ޚާއްސަކުރަންވާނެކަމަށް ލޯނާއި ބެހޭ އުސޫލުގައި ވަނީ ބަޔާންކޮށްފައެވެ.
މީގެ އިތުރުން އަލީފް ވިދާޅުވި ގޮތުގައި މިލޯން ސްކީމް ފަރުމާކޮށްފައިވަނީ ފުވައްމުލައް ސިޓީގައި އާންމު ގޮތެއްގައި މަސައްކަތްކޮށް އުޅޭ ގިނަ ދާއިރާތަކަށް ކުރިމަތިލެވޭނެ ފަދަ ގޮތަކަށެވެ. އެގޮތުން މިސްކީމަށް ކުރިމަތިލެވޭނެ 14 ދާއިރާއެއް ކައުންސިލުންވަނީ ކަނޑައަޅައިފައެވެ. އެއީ އަތްތެރި މަސައްކަތް، ބިއުޓީ އަދި މޭކްއަޕް ކުރުން، ފޮޓޯގްރަފީ އަދި ވީޑިއޯގްރަފީ، ފެހުން އަދި ޓެކްސްޓައިލްސްގެ މަސައްކަތް، އިންފޮމޭޝަން ކޮމިއުނިކޭޝަން ޓެކްނޮލޮޖީ، ކްރިއޭޓިވް އާޓްސް އަދި މިއުޒިކް، ކުޅިވަރު އަދި ފިޓްނަސް، މަސްވެރިކަން، އިލެކްޓްރިކަލް ވަޔަރިންގް އަދި މެއިންޓެނަންސް، މެނުފެކްޗަރިން، ދަނޑުވެރިކަން، ވެލްޑިންގް އަދި ކާޕެންޓްރީގެ މަސައްކަތް، ފަތުރުވެރިކަން އަދި އަމިއްލަ އުފެއްދުންތެރިކަމެވެ.
ތިރީގައި މިވަނީ މިލޯނަށް އެދި ހުށައަޅައި ފަރާތްތަކުން ފުރިހަމަވާން ޖެހޭ ޝަރުތުތަކެވެ.
ފުވައްމުލަކު ސިޓީ ކައުންސިލުން އިތުރަށް މައުލޫމާތު ދިން ގޮތުގައި ލޯނަށް އެދެން ބޭނުންވާ ފަރާތްތަކުން އެކަމަށް އެދި ހުށައަޅަންޖެހެނީ އެ އިދާރާއިން އެކަމަށް ކަނޑައަޅާފައިވާ ފޯމުންނެވެ. އަދި ފޯމާއި އެކު އެފަރާތަކުން ކުރަން / ގަންނަން ގަސްތުކުރާ އެއްޗެއްގެ ކޯޓޭޝަން ފޯމާއިއެކު ހުށަހަޅަންވާނެއެވެ. މީގެ އިތުރުން ލޯނަށް އެދޭ ފޯމާއިއެކު ބިޒްނަސް ޕްރޮޕޯސަލްއާއި ވިޔަފާރި ކުރަމުންދާ ފަރާތަކުން ލޯނަށް އެދި ހުށަހަޅާނަމަ ފާއިތުވި 6 މަސް ދުވަހުގެ ބޭންކް ސްޓޭޓްމެންޓް ހުށަހަޅަންވާނެއެވެ.
ފުވައްމުލައް ސިޓީ ކައުންސިލުން އިތުރަށް ހާމަކުރި ގޮތުގައި ލޯނާއި ބެހޭ އިތުރު މައުލޫމާތާއި ލޯނަށް އެދި ހުށައަޅަންޖެހޭ ފޯމު އެ ކައުންސިލުގެ ވެބްސައިޓުންނާއި ފުވައްމުލަކު ސިޓީ ކައުންސިލް އިދާރާއިން ލިބެން ހުންނާނެއެވެ.
