ގދ. ތިނަދޫ ކައުންސިލުން ތިނަދޫގައި ތިބި ސަރުކާރުގެ މުއައްސަސާތަކަށާއި އޮފީސްތަކަށް ހުޅުވާލައިގެން ކުރިއަށްގެންދިޔަ އޮފީސް ފުޓްސަލް މުބާރާތުގެ ޗެމްޕިއަންކަން ތިނަދޫ ޕަބްލިކް ވޯކްސްއިން ހޯދައިފިއެވެ.
ރޭ ތިނަދޫ އާރު އަވަށު ފުޓްސަލް ދަނޑުގައި ކުޅުނު ފައިނަލް މެޗުގައި ބައްދަލުކުރީ، ކާޑެއްދޫ އާއި ތިނަދޫ ޕަބްލިކް ވޯކްސް ޓީމެވެ. މި މެޗު ޕަބްލިކް ވޯކްސް އިން ކާމިޔާބުކުރީ 4 – 3 ގެ ނަތީއްޖާ އަކުންނެވެ.
މިމެޗުގެ ފުރަތަމަ ހާފު ޑޮމިނޭޓްކޮށްގެން ކުޅެމުން ދިޔައީ ޕަބްލިކް ވޯކްސްއިންނެވެ. އެހެން ނަމަވެސް ކައުންޓަރ އެޓޭކުތަކުން ކާޑެއްދޫ ޓީމުން ވަނީ ޕަބްލިކް ވޯކްސްގެ ގޯލަށް ނުރައްކާ ކޮށްފައެވެ. ނަމަވެސް ކާޑެއްދޫއިން ކުރި އެޓޭކްތަކުގެ ހުރަހަކަށް ވީ ޕަބްލިކް ވޯކްސްގެ ކީޕަރެވެ. މި މެޗުގެ ފުރަތަމަ ހާފުގައި އޭނާ ވަނީ މުހިންމު ސޭވްތަކެއް ކޮށްދީފައެވެ. މެޗުގެ ދެވަނަ ހާފުގައި ކާޑެއްދޫއިން ވަނީ ކުޅުން ރަނގަޅުކޮށްފައެވެ. ނަމަވެސް އެޓީމަށް ޕަބްލިކް ވޯކްސްގެ ޑިފެންސް ފޫއަޅުވާލެވޭ ގޮތެއް ވަނީ ނުވެފައެވެ.