ލ. ގަން ރީޖަނަލް ހޮސްޕިޓަލުން ސިޒޭރިއަން ހެދި އަންހެނަކު ނިޔާވެއްޖެއެވެ.
ނިޔާވެފައިވަނީ ލ. ހިތަދޫ އަށް ނިސްބަތްވާ އުމުރުން 41 އަހަރުގެ ދިވެހި އަންހެނެކެވެ.
މައުލޫމާތު ލިބިފައިވާ ގޮތުން އެ އަންހެން މީހާ ނިޔާވެފައިވަނީ ރޭގެ ވަގުތެއްގައި ސިޒޭރިއަން ހެދުމަށް ފަހު ފަރުވާ ދެމުން ދަނިކޮށެވެ.
އިއްޔެ ހެނދުނު އެމީހާ ހޮސްޕިޓަލަށް ގެންދިޔައިރުވެސް ސިޒޭރިއަން ހެދި ލަކުނު ފަޅައިގެން ގޮސް ލޭ ފައިބަމުން ދިޔަ ކަމަށާއި އަންހެންމީހާ ނިޔާވީ ދަރިފުޅު ނަގާފައި ފަރުވާ ދެމުން ދަނިކޮށް ކަމަށް ލ. ގަން ހޮސްޕިޓަލުގެ ޑިޕިއުޓީ ސީއީއޯ މުހައްމަދު ޝިޔާމް ވަނީ ވިދާޅުވެފައެވެ. އިތުރަށް ޝިޔާމް ވިދާޅުވީ ސިޒޭރިއަން ހަދައި ނިމިގެން ފުދޭވަރަކަށް ލޭއަޅަން ޖެހުނު ކަމަށާއި ފަހުން ކުއްލިއަކަށް ހާލު ބޮޑުވެގެން އައިސީޔޫއަށް ލާން ޖެހުނުކަމަށެވެ. އަދި އަންހެންމީހާ ނިޔާވީ ލޭ މަނާ ނުވެގެން ނޫންކަމަށް ޝިޔާމް ވިދާޅުވިއެވެ.
ސިޒޭރިއަން ހަދައި އަންހެން މީހާގެ ބަނޑުން ދަރިފުޅު ނެގިއިރު ބަނޑަށް 33 ހަފްތާއެވެ. ވިހެއި ކުއްޖާއަށް އެންއައިސީޔޫގައި ފަރުވާ ދެމުން ދިޔަ ނަމަވެސް، ހާލު ދެރަވެގެން މިވަގުތު އިތުރު ފަރުވާއަށް މާލެ ފޮނުވުމުގެ މަސައްކަތް ކުރަމުން އަންނަކަމަށް ހޮސްޕިޓަލުން ވަނީ ބުނެފައެވެ،