ގދ. ތިނަދޫ އިން ކައްކާ ގޭސް ހުސްވެ އެރަށަށް ގޭސް ގެނައުމުގައި ދަތިތަކެއް ކުރިމަތިވެފައި ވަނީ މުޅި ރާއްޖެއަށް މޫސުން ގޯސްވެ ކަނޑު ދަތުރުފަތުރު ކުރުމުގައި ދަތިތަކަކާއި ކުރިމަތިލާން ޖެހިފައިވާތީ ކަމަށް ތިނަދޫއަށް ގޭސް ގެންނަ ވެލްކޯ ޝިޕިން އެންޑް ޓްރޭޑިން އިން ބުނެފިއެވެ.
ތިނަދޫއިން ކައްކާ ގޭސް ހުސްވުމުގެ ކުރިން ގޭސް ގެނައުމުގެ މަސައްކަތް އެކުންފުނިން އަބަދުވެސް ކުރާ ކަމަށާއި ނަމަވެސް މިފަހަރު މޫސުން ގޯސްވުމުގެ ސަބަބުން ކަނޑު ދަތުރުފަތުރު ކުރުމުގައި ހުރި ދަތިތަކާއި އެކު ގޭސް ހިފައިގެން ތިނަދޫއަށް ފުރަން އޮތް ބޯޓު ފުރުމުގައި ލަސްތަކެއް ދިމާވިކަމަށް ވެލްކޯއިން ބުނެއެވެ.
ގޭސް ފޯރުކޮށްދިނުމުގައި ސްޓޮކަށް ދިމާވާ ދަތިތައް މޯލްޑިވްސް ގޭސް މެދުވެރިކޮށް ހައްލުކޮށް ސްޓޮކް އިތުރު ކުރުމުގެ މަސައްކަތް ކުރަމުން އަންނަ ކަމަށްވެސް އެކުންފުނިން ބުނެއެވެ.
