ރޭ އަލިމަސްކާނިވާ ސަރަހައްދުގައި ހުރި ބަސް ޓާމިނަލް ކުރިމަތީގައި މީހެއްގެ ދެފައިބަނދެ، ހިންގި ހާދިސާ އާއި ގުޅިގެން ފުލުހުންނަށް ގިނަ ފާޑުކިޔުންތަކެއް ކުރިމަތިވުމާއި ގުޅިގެން އެ ހާދިސާގެ ތަފްސީލް ފުލުހުން ހާމަކޮށްފިއެވެ.
ރޭ މީސް މީޑިއާގައި އާންމުވެގެން ދިޔަ ވީޑިއޯ އިން ފެންނަނީ މީހެއްގެ ފައިބަނދެ އެ މީހާ މައިތިރި ކުރުމަށް ބަޔަކު މަސައްކަތްކުރަމުން ދިޔަ މަންޒަރެވެ. އެމީހާ މައިތިރިކުރަން މަސައްކަތްކުރި މީހުންނާއި، އެމީހާއަށްވެސް މި ހާދިސާގައި ކުދިކުދި އަނިޔާތައް ލިބުނު އިރު އެ ވަގުތު އެ ތަނުގައި ތިން ފުލުހުންވެސް ހަރަކާތްތެރިވަމުން ދިޔަ މަންޒަރު ފެނުނެވެ. އެހެންނަމަވެސް ފުލުހުން އެމީހުން ދުރުކޮށް ސުލްހަކުރުމަށް އެއްވެސް މަސައްކަތެއް ކޮށްފައި ނުވާއިރު މިކަމާއި ގުޅިގެން ފުލުހުންނަށް ވަނީ ގިނަ ފާޑު ކިޔުންތަކެއް ކުރިމަތިވެފައެވެ.
ރޭގޭ ހާދިސާގެ ތަފްސީލް ދެއްވަމުން ފުލުހުން ބުނީ އާންމުވެފައިވާ ވީޑިއޯއިން ފެންނަނީ އާއިލާއަކުން ހޯދަމުންދިޔަ ނުކުޅެދުންތެރިކަން ހުންނަ މީހެއްގެ ފަރުވާއަށް ހޮސްޕިޓަލަށް ގެންދަން މަަސައްކަތް ކުރުމުން އެކަމާ ދެކޮޅު ހަދާ ގަދަ ދެއްކުމުން އޭނާ ހޮސްޕިޓަލަށް ގެންދިއުމަށް އާއިލާއިން މަސައްކަތް ކުރި މަންޒަރު ކަމަަށެވެ.
މި މައްސަލައާއި ގުޅިގެން ކޮމިޝަނަރު އޮފް ޕޮލިސް މުހައްމަދު ހަމީދު ވަނީ ޕްރޮފެޝަނަލް ސްޓޭންޑާސް ކޮމާންޑަށް، މި ހާދިސާ ހިނގި ވަގުތު އެ ސަރަހައްދުގައި ތިބި ފުލުހުން އަމަލުކޮށްފައިވަނީ އޮންނަ އުސޫލުތަކުގެ ތެރެއިންތޯ އާއި ފުލުހުންގެ ދައުރު އަދާކޮށްފައިވާ ގޮތް ބަލަން އަންގާފައެވެ.