ކޯވިޑް-19އާއި ގުޅިގެން އައްޑޫސިޓީގައި އިޢުލާންކޮށްފައިވާ ކާފިއު ގެ މުއްދަތު 1 ހަފްތާގެ މުއްދަތަށް އިތުރުކޮށްފިއެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވާ، ހެލްތު ޕްރޮޓެކްޝަން އެޖެންސީ، އެޗް.ޕީ.އޭއިން ނެރެފައިވާ އެންގުމުގައިވަނީ ކޯވިޑް-19 އިން ރައްކާތެރިވުމަށް ޚާއްޞަ ފިޔަވަޅުތަކެއް އަޅުއްވާފައިވާއިރު އެ ފިޔަވަޅުތައް އިތުރު 7 ދުވަހުގެ މުއްދަތަކަށް އިތުރުކުރުމަށް ނިންމާފައިވާކަމަށެވެ.
އައްޑޫން ކޮވިޑް-19 ގެ ޕޮޒިޓިވް ކޭސްތަކެއް ފެނި ކޮމިއުނިޓީ ސްޕްރެޑެއް އޮތް ކަމަށް ބެލެވޭތީ ރައްކާތެރިކަމުގެ ފިޔަވަޅެއްގެ ގޮތުން ފެބްރުއަރީ 9 އަކުން ފެށިގެން އެއް ހަފުތާއަށް ކާފިއު ހިންގަން މީގެ ކުރިން ވަނީ ނިންމާފައެވެ. އައްޑޫގައި ކާފިއު ހިންގާ ވަގުތަކީ ރޭގަނޑު 8:00 އިން ފަތިހު 4:00އަށް ކަމަށް ވެފައި މި ވަގުތުގެ ތެރޭ މަގުމައްޗަށް ނުކުމެ އުޅުމަކީ މަނާކަމެކެވެ.
އައްޑޫގައި ކާފިއު ހިންގާފައިވާ މި ދަނޑިވަޅު އައްޑޫ ސިޓީގައި ޢާއްމުކޮށް ދެމުން އަންނަ ގިނަ ޚިދުމަތް ތަކެއް މިވަގުތަށް ވަނީ މެދުކަނޑާލާފައެވެ. އޭގެ ތެރޭގައި
* ސްކޫލް/ކޮލެޖް/ޔުނިވަސިޓީތައް ބަންދުކުރުން
* މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލުން
* ކެފޭ/ރެސްޓޯރަންޓްތައް އާންމުކޮށް ހުޅުވައިގެން ހިދުމަތް ދިނުން ހުއްޓާލުން
* ގާޑިޔާ ވިޔަފާރިތައް މެދުކަނޑާލުން
* ޖިމް/ސެލޫންތައް ބަންދުކުރުން
* ކުޅިވަރު ކުޅޭ ތަންތަން ބަންދުކޮށް/ކުޅިވަރު ހަރަކާތްތައް ހުއްޓާލުން
* އާންމު މައިދާންތަކާއި ޕާކްތަކަށް ދިއުން މަނާކުރުން
* އެއްފަހަރާ ތިން މީހުންނަށް ވުރެ ގިނައިން އެއްނުވުން
* ފެރީ އާއި ޓެކްސީގެ ހިދުމަތްތައް އެޗްޕީއޭގެ ގައިޑްލައިންތަކާ އެއްގޮތަށް ދިނުން އަދި
* އެއް ގެއިން އަނެއް ގެއަށް ނުދިއުން ހިމެނެއެވެ.
