ހުޅުމާލެއިން ހދ. ހަނިމާދޫ އަށް ދަތުރު ކުރި “ނައުޓިލަސް ވަން” ނަމަކަށް ކިޔާ ސަފާރީއެއްގައި ރޯވެ އަނދަމުންދާ ކަމަށް އެމްއެންޑީއެފުން ވިދާޅުވެއްޖެއެވެ.
ކ. ކާށިދޫގެ ހުޅަނގުން 13 ނޯޓިކަލް މޭލު ބޭރުގައި އޮތް މި ސަފާރީގައި 6 މީހުން ތިބި ކަމަށާއި މިހާރު އެމީހުން ތިބީ ޑައިވިންގ ދޯނީގައި ކަމަށް އެމްއެންޑީއެފުން މައުލޫމާތު ދެއްވައެވެ.
މި ދޯނީގައި ތިބީ ހުސް ފަޅުވެރިން ނެވެ. އޭގެ ތެރޭގައި 5 ދިވެހިންނާއި 1 ބިދޭސިއަކު ހިމެނެއެވެ.
މި ހާދިސާގެ ރިޕޯޓް އެމްއެންޑީއެފަށް ލިބިފައިވަނީ ދަންވަރު 3:45 ގައި ކަމަށާއި އެހާ ހިސާބުން އެމްއެންޑީއެފްގެ ފަޔަރ ލޯންޗެއް އަލިފާން ނިއްވުމުގައި އެ ސަރަހައްދުގައި ހަރަކާތް ތެރިވަމުން އަންނަ ކަމަށް އެމްއެންޑީއެފުން މައުލޫމާތު ދެއްވައެވެ.
އެމްއެންޑީއެފުން މިއަދު 6:50 ގައި ވިދާޅުވީ އަލިފާން ނިއްވުމުގެ މަސައްކަތް ކުރަމުން ދަނިކޮށް 6:44 ގައި ސަފާރީ ކަނޑު ގެ އަޑިއަށް ގޮސްފައިވާ ކަމަށެވެ.
މިހާދިސާގައި އަދި އެއްވެސް މީހަކަށް އަނިޔާވި ކަމުގެ މައުލޫމާތު ލިބިފައެއް ނުވެއެވެ