އައްޑޫ ސިޓީގައި ޞިއްޙީ ފުޅާ ދާއިރާއެއް ޞިއްޙީ ޚިދުމަތްތައް ދެމުން އަންނަ އެއިމްސް ކްލިނިކް އާއި، ހެޕީ މާކެޓް ކުންފުނިން އައްޑޫގެ ޞިއްޙީ އިދާރާތަކަށް ފޭސް ޝީލްޑް ހަދިޔާކުރުމަށް ނިންމައިފި އެވެ.
ހެޕީ މާކެޓްގެ ސީ.އީ.އޯ އަދި އެއިމްސް ކްލިނިކްގެ މެނޭޖިންގ ޑިރެކްޓަރ، އަލީ އިހުސާން މިރޭ ކުރެއްވި ޓްވީޓެއްގައި ވިދާޅުވެފައި ވަނީ އެއިމްސް ކްލިނިކާއި ހެޕީ މާކެޓްގެ ފަރާތުން އައްޑޫ ހޮސްޕިޓަލާއި، ޞިއްޙީ މަރުކަޒުތަކަށް ހަދިޔާކުރުމަށް 500 ފޭސް ޝީލްޑް ތައްޔާރުކޮށްފައިވާ ކަމަށެވެ. އަދި އެ ޝީލްޑްތައް ތައްޔާރުކުރުމުގައި އެހީތެރިވެދިން ޕައިލެޓެއް ކަމަށްވާ މުޙައްމަދު ރަނޭޝް އަށް އިހުސާން ވަނީ ޝުކުރު ދަންނަވައިފަ އެވެ.
AIMS Clinic adhi Happymarket ge faraathun Addu Hospitalaai Health Center thakah hadhiyaa kuran thayyaru kurevifaivaa 500 Faceshield. Thank You Pilot @MRaneysh for your efforts to make these shields. We will dispatch to Addu in the next available transport. pic.twitter.com/9YklJd8mnw
— Ali Ihusaan (@ali_ihusaan) June 4, 2020
އިހުސާން ވިދާޅުވީ އެ ދެން އެންމެ އަވަހަށް ފޮނުވެން އައި ގޮތަކުން އެ ޝީލްޑްތައް އައްޑޫ އަށް ފޮނުވުމަށް ޑިސްޕެޗްކުރާނެ ކަމަށެވެ.
ކޮވިޑް-19 އާއި ގުޅިގެން ހެޕީ މާކެޓުންނާއި އެއިމްސް އިން ދަނީ އައްޑޫ ސިޓީ އާއި މުޅި ރާއްޖެއަށްވެސް އެކި ގޮތްގޮތުން އެހީތެރިކަން ފޯރުކޮށްދެމުންނެވެ. އެގޮތުން ހެޕީ މާކެޓުން ވަނީ ކޮވިޑް-19 އާއި ގުޅިގެން އައްޑޫގެ އިތުރުން ރާއްޖޭގެ އެހެން ބައެއް ހިސާބުތަކުގައި ޤާއިމްކޮށްފައިވާ ޓާސްކް ފޯސްތަކާއި، ފުލުހުންގެ ޗެކްޕޮއިންޓްތަކަށްވެސް އެހީތެރިކަން ފޯރުކޮށްދީފަ އެވެ. އަދި އެއިމްސް ޑައިގްނޯސްޓިކް ކެއަރގެ ފޭދޫ ބްރާންޗުން ކޮވިޑް-19 އަށް ޓެސްޓްކުރެވޭނެ އިންތިޒާމް ހަމަޖައްސައި، އެކަމުގެ ހުއްދައަށްވެސް އެ ކްލިނިކުން ވަނީ އެދިފައެވެ. ނަމަވެސް ސަރުކާރުން ވަނީ އެ ހުއްދަ ނުދިނުމަށް ނިންމައިފަ އެވެ.
