ސެނެގޯލުގެ ރަމަޟާނީ ޖައްވަށް ބަލާ އިރު އެއީ ދުވާލު ވަރަށް ޙަރަކާތްތެރި ރޭގަނޑު ވަރަށް ހަމަހިމޭން ޖައްވެކެވެ. އިރުއޮއްސުނީއްސުރެ ގޮސް ފަތިސް ވަންދެން މަގުމަތި އޮންނާނީ ވަރަށް ހަމަހިމޭންކޮށެވެ. މުވާޞަލާތީ ޢާއްމު ވަސީލަތްތައްވެސް (ބަހާއި ޓެކްސީ ފަދަ އުޅަނދުތައް ) މަގުމަތިން ވަރަށް މަދުން މެނުވީ ނުފެންނާނެތެވެ. ތަރާވީޙު ނަމާދު ނިމުމާ އެކު އެންމެން ގެއަށްގޮސް އޮށޯވެދާނެތެވެ. ރޭގަނޑު ހޭލައިއުޅުމުގެ އާދައަކީ އެމީހުންގެ ތެރޭގައި އޮންނަ ކަމެއް ނޫނެވެ.
ފަހު ދިހައިގެ ރޭތަކުގައި އިޢުތިކާފަށް ތިބޭ މީހުން ވަރަށް މަދުން ނޫނީ ނުފެންނާތެވެ. ނަމަވެސް ލައިލަތުލް ޤަދްރި ވިލޭރޭ އިޙްޔާކޮށް ދިރުވުމަށް ވަރަށް ޚާއްޞަ ސަމާލުކަމެއް ދެއެވެ. އެމީހުން ދެކޭ ގޮތުގައި އެއީ ރަމަޟާން މަހުގެ 27 ވިލޭރެއެވެ. އެ ރޭ ފަތިސް ވަންދެން މިސްކިތުގައި އަޅުކަން ކުރުމާއި ޤުރްއާން ކިޔެވުމުގައި ހޭލައި ތިބޭނެތެވެ.
ސެނެގޯލުގެ މުސްލިމުން ރޯދަ ވީއްލާނީ ހޫނު އެއްޗަކުންނެވެ. ނުވަތަ އާދައިގެ ފެންފޮދަކުންނެވެ. އެމީހުން ބުނާ ގޮތުގައި މަޢިދާއަށް އެންމެ ރަނގަޅީ ހޫނު އެއްޗެއްސެވެ. އެއަށްފަހު ރޯދަވީއްލުމުގެ ކެއުމެވެ. މިއީ ސެނެގޯލުގެ އެކި ހިސާބުގައި ތަފާތު އެއްޗެކެވެ. ހާރު ވެސް އޮތީ ހަމަ މި ކަހަލަ ގޮތަކަށެވެ.
ސެނެގޯލުގެ މުސްލިމުން ރޯދަވީއްލުމަށްޓަކައި ރޯދަވީއްލުމުގެ ދޮލަނގުތައް ތައްޔާރު ކޮށް މިސްކިތް ދޮށަށް ފޮނުވައެވެ. ހަމަ އެފަދައިން ފިޠުރު ޒަކާތް ނެރުމުގައި އަވަސްވެ ގަނެތެވެ. މިއީ އެމީހުން ދެކޭގޮތުގައި ސެނެގޯލުގެ ފަޤީރު މުސްލިމުންނަށްޓަކައި އަދާކުރަން ޖެހޭ ވާޖިބެކެވެ.
* މިއީ ލިޔުންތެރިންގެ ގުޅުމުން ނަގާފައިވާ ލިޔުމެކެވެ.
